核心外圍

星期五晚問朋友，有冇興趣星期六同我去核心外圍野餐，有d朋友唔知我講咩都陪我，物以類聚，原來我d朋友都同我一樣係傻嘅😉😉😉

話說黎明4D演唱會因為布幕不符合規格而不獲發牌，經開會之後拆除布幕，反而令外圍朋友可以聽到演唱會。前文話我雖不是黎明fans，但都識唱佢幾首歌，呢個咁特別聽演唱會嘅機會我點會錯過。

星期六晚同朋友買咗d食物帶咗張地真係去野餐😁😁😁 朋友仲帶埋生果，直情似去賞月🌙 天公造美冇落雨又唔太熱，可能我地坐得遠，有時都聽得唔係太清楚。但大部份人都好興奮，尤其旁邊有幾個小朋友不時大叫Leon Leon，有d仲跳舞。有遊客經過可能都覺得好奇怪點解咁多人坐喺度，我唸好彩唔係星期日，如果唔係要同外傭爭地方😅😅😅

大家好開心懶理天氣熱地下硬冇encore唱完嗌完跳完又一晚，我覺得呢類節目應該多攪，可能係另類商機吸引遊客嘅節目。朋友慨歎演唱會飛咁貴，一家大細有幾可一齊聽演唱會？呢一晚誤打誤撞，黎明就比咗一個好節目大家😁😁😁