S@S@: 餵食篇

顯示具有 餵食篇 標籤的文章。顯示所有文章

2019年3月4日星期一

喜歡煮食？

同事J說，如果自己獨自在家，午晚餐通常會吃杯麵，貪其方便。

熟悉我的朋友都知道，我極少吃杯麵，甚至是即食麵都很少吃，或許是早年初出來獨居時懶，常以即食麵當正餐，一段時間後竟然看著麵的包裝都生厭.....

那時候，有朋友都是獨居，間中我們都會分享食即食麵的方法。朋友通常只將即食麵淥熟就食；但我卻喜歡加上不同的配菜，例如今天是魚蛋墨魚丸，明天要貢丸魚皮餃，總之配菜要日日不同，所以家裡雪櫃總有些配菜的存貨。

同事J結論是，我應該喜歡煮食。

但與其說我喜歡煮食 (其實我一般，最主要看心情)，不如說我不愛千篇一律不愛重複較洽當吧。

2016年7月16日星期六

蛋

蛋是一種很有營養價值但又便宜的食物，可是要煮得好卻又不容易；例如荷包蛋（要煎得靚於我一點都不容易）、炒蛋（個人喜愛滑蛋，最怕熟蛋）。

小時候有一次因為媽媽病了，我要煮飯，當然是打算煮一些簡單菜式，雪櫃內亦當然地有蛋，那就蒸水蛋吧！可是，第一次蒸水蛋，我卻忘了要加水 😅😅😅 那出來的效果，大家都估到吧 😤😤😤 早前與家人說起，幸好大家都忘了我這件「瘀事」😜😜😜

以前貪方便，通常都會將水蛋放在飯煲內煲飯時一起蒸蛋，但蛋通常都皺皮變老。後來才知道蛋面皺皮是因為蒸的時候有倒汗水，防止方法是蓋著蛋面蒸，可以用煮食保鮮紙或錫紙但個人喜愛用另一隻碟蓋著，再配合時間，那蒸出來的水蛋就會很滑啦。

2015年8月8日星期六

香港人… 食餐飯都趕過人…

有一日同朋友去添好運食飯，攞飛時講明齊人先比入，ok明白此乃遊戲規則…

終於等齊人啦，又要等有枱…
等候期間朋友同囡囡去廁所，行開咗…
呢個時間有枱喎，咪入去坐低囉…

坐低，派飛人過來見我地有吉位，話我地呃佢齊人，「比五分鐘你唔齊人要起身等過」
仲即刻叫侍應唔好入我地張點心飛 😬😬
🔥🔥而家咩事先？

其實我真係好想起身走，奈何同行有小朋友…

一路食一路見出面好多人等位，如果坐近門口，你會被一對對虎視眈眈嘅眼睛，不斷不斷用眼神催促你走…
食餐飯唧，點解會咁有壓力？

香港食店真係不可思異，因為舖租貴，有好多規矩，包括不設訂位，唔派飛要你排隊等位（但起碼等一個鐘），人齊先可以入座，限時1.5小時要埋單…

食飯，其實係享受，享受食物嘅質數，食店嘅環境，朋友之間吹水聯誼，天倫之樂… 但點解今時今日食餐飯都要咁趕？

2014年11月16日星期日

懶人的晚餐

今日去行山，由五塊田行到去布袋澳，行了兩個山頭，全程四小時，累死！

回家途中已經很肚餓，但又要沐浴更衣，靈機一觸，將雪櫃內的物資泡製了一個……

將半個洋蔥爆香，加入肥牛略炒，加水餚湯……
這個時候正好就去沐浴……
沐浴完，將長通粉加入湯內，適量加入鹽調味；再去吹乾頭髮，出來就可以吃啦！
七時回到家，八時可以乾乾淨淨地吃一個熱辣辣晚餐，時間配合得天衣無縫……

可能因為太肚餓，有湯又飽肚，份外好味道！

但忘了為這個「洋蔥肥牛湯長通粉」影相 :p

2014年9月3日星期三

好肚餓？

曾經有一次旅行，導遊跟我們說: “旅行時食物只是用來求生，不要太介意味道，最緊要吃得飽，因為路上可能有很多突發事，不知下一餐會不會準時有得吃！”

從來都是一個可以食很多東西的人，試過很多次嚇壞身邊人.....

曾經跟我共事應該不會陌生，有一次新加入一間公司，幾個女同事去吃午飯，她們叫三文治、通粉等，唯獨我叫了碟頭飯，而且整碟吃完。自此之後，她們就常對人說我很犀利，可以吃全碟飯！

另一次，又是與同事吃午飯，對面的男同事叫了跟我一樣的炒飯，我們吃著吃著，他突然對我說: “妳好囉喎，其實我已經飽咗好耐，但見妳一直未停手，我唯有食落去，我冇理由食得少過妳，但妳一路唔停，我實在食唔落去啦！” :p

年輕時，有本事亦有quota，試過一次跟同事食自助午餐，由沙律開始、熱食、魚生、甜品; 同事個個已飽停手，我卻意猶未盡，再由沙律開始重新吃一遍，同事個個目定口呆。不過如今年紀漸大，新陳代謝減慢，已經不可以再令自己太飽。

以前，覺得食物只用作飽腹，不太介意味道，尤其是只有自己一個人吃; 但如果跟朋友一起，我就會徧向著重食物的質素與餐廳的環境。

所以，不要再試探問我係唔係好肚餓，只要需要工作或體力勞動，我絕對要食足三餐！因為我實在需要食物轉化給我的力量，而且區區一碟沙律、一個麵包或一碗湯於我絕對不當是正餐，甚至是毫無感覺可言！哈哈哈哈哈.....

2013年12月31日星期二

金婚紀念 @ 1314

五十年, 一個頗長的日子!
五十年的婚姻, 相信對今天很多人來說會是天方夜潭, 遙不可及!

記憶中, 父母不會表現太恩愛, 可能是上一代人比較保守.
而我們就如其他家庭一樣, 時而嘻嘻哈哈, 時而吵吵鬧鬧; 但有時我又會覺得他們在互相埋怨, 也許這就是他們相處的方式.

直至父母年紀開始大, 相繼因為身體出現毛病要進出醫院, 卻又發現他們在互相依靠, 彼此照顧. 可能這就是昇華的感情吧, 畢竟五十年的堅持, 五十年的感情, 五十年的經歷並不容易!

特別的日子, 又要讓我的家人啃我的拙作, 沒辦法啦, 辛苦晒!
當然是我班侄仔侄女最愛的朱古力蛋糕啦, 吃完他們還給我每人兩隻大姆指的叻叻 (冧晒 ^.<)

沒麵粉的朱古力蛋糕食譜:
http://www.christinesrecipes.com/2008/09/flourless-chocolate-cake.html?m=1

蛋糕上的『50』是曲奇餅, 時間關係手繪手界所以比較岩蠶, hehehe.....

在2013年尾, 2014年快來的特別日子, 但願大家都珍惜眼前人, 一同經歷一生一世 (1314)!

早前有關網誌: 全盒

2013年10月31日星期四

焗南瓜西米布甸

嗜甜 .....

想食焗西米布甸, 剛好見街市有很多南瓜 (可能因為萬聖節, 嘻嘻 .....), 試做 .....

參考以下食譜:
http://www.christinesrecipes.com/2009/03/baked-tapioca-custard.html
非常喜歡基絲汀的簡易食譜, 又容易又好味道, 再改一改如下:

(1)
西米 45gm

(2)
鮮奶 100ml
吉士粉 2湯匙
蛋 1隻 (打成蛋汁)

(3)
鮮奶 150ml
花奶 50ml
糖 45gm
牛油 20gm

(4)
南瓜 (去皮蒸淋壓成茸)

先將 (1) 浸水20分鐘, 用滾水煮10分鐘, 熄火焗至透明, 再沖凍水瀝乾.
將 (2) 攪勻
將 (3) 用小火煮溶, 加入 (2) 煮至濃稠
熄火, 加入 (1)

焗爐預熱 200度
將一半材料倒入焗盆, 加入南瓜茸, 再倒入餘下材料至九成滿
坐水焗15-20分鐘至表面微黃

好好味呀 .....
記緊趁熱 .....

2013年10月30日星期三

合桃曲奇餅

曲奇餅 --- 看似好簡單, 但原來做起來都不易 .....
試過幾個食譜, 都好味, 但不是淋身不夠脆, 就是太脆結果食的時候會弄至『一地都係』

最後好友 F 給我食譜, 終於成功啦!
所以很想很想跟各位分享, 因為自己廚藝一向很差, 但很希望做一些小食給家人朋友.
試過很多次之後, 明白成功並不容易.
所以如果大家有其他更好食譜, 歡迎分享.

(1) 牛油 125gm (室溫放軟)
(2) 糖粉 (糖霜) 63gm
(3) 蛋白 30gm
(4) 低筋麵粉 75gm
(5) 鷹粟粉 45gm
(6) 麵粉 45gm --- 但因為家裡無麵粉, 所以我用了低筋麵粉替代
(7) 鹽少許
(8) 合桃適量

先將 (1) (2) 打勻, 加入 (3) = (A)
將 (4) (5) (6) 過篩, 加上 (A) 打至混合
加入 (7), 可令曲奇餅脆身 = (B)

下圖是先將曲奇餅粉搓成曲奇餅形後, 再加合桃在上才焗:

另一方法, 將合桃加入 (B), 用保鮮紙包成長條形狀, 放入冰箱一小時, 切片.
那就更易定型, 而且合桃混在其中, 更平均及食的時候, 合桃不易跌出來.

預熱焗爐, 180度焗10-15分鐘, 當曲奇餅轉金黃色後, 可將爐溫轉至160度之後熄爐, 用餘溫焗一會, 可令曲奇餅水份抽出及質地更鬆化.

焗好之後, 記緊放在架上, 待涼才食, 否則嘴巴會熱熟!
我食啦, 嘻嘻 .....

2012年9月20日星期四

重複的錯誤

天下間最令人沮喪之事, 莫過於開午餐肉時條匙斷咗 >.<

第一個反應係用罐頭刀解決

但罐頭刀去到長方形午餐肉罐上嘅轉彎位根本過唔到, 唔得

於是搵嚟另一把罐頭刀 (實質係開瓶器, 可開汽水啤酒那一種), 有一個尖位可插入罐頭, 都唔得

再試用刀放入那一條匙嘅圈位拉, 好似好危險, 我唔想成為香港第一個因為開午餐肉不遂但被誤會為割脈嘅人; 改用餐刀, 都係唔得

!

結果被一罐午餐肉折騰咗半粒鐘

過程中令我想起, 之前已經有斷匙嘅經驗, 好幾次都叫自己唔好再買長方形罐嘅午餐肉!
但每次去買嘅時候, 又會因為圓罐太大而買番長方形罐!
如是者, 每次都被重覆嘅錯誤折磨

其實由細到大, 呢個問題都經常發生, 很多朋友都有相同經歷, 究竟午餐肉公司有冇唸過改善方法?

早前有關午餐肉的網誌:
http://www.blogger.com/blogger.g?blogID=8109604990588026306#editor/target=post;postID=3957501239133810471;onPublishedMenu=posts;onClosedMenu=posts;postNum=4;src=postname

2012年8月27日星期一

入廚樂

我對煮食一向興趣不大.
因為小時候, 家母總覺得我阻著她, 不太喜歡我入廚房.
到長大之後, 家母有時要我入廚幫忙, 卻總是嫌三嫌四說我不懂.
我往往在旁說: 『都是因為妳不教我!』
所以一直, 我的廚藝都很差, 而我總推說因為自己沒有天份!

紐約的朋友煮得一手好菜.
上一趟美加之旅, 我跟他們一家去了一次wild camp.
外國人的wild camp是帶上營具, 煮食煲具, 食物, 甚至燒烤爐, 與家人朋友駕車幾小時去一個營區住幾天.
那一次, 朋友預備了湯圓給大家做甜品.
對香港的朋友, 湯圓很普遍; 但對外國長大的ABC, 有很多小朋友從未吃過湯圓.

朋友對食很堅持, 即使去wild camp都自備燸米粉, 花生醬, 薑, 片糖等, 即時搓湯圓.
當做起的時候, 大部份的小朋友 (由7-15歲) 初時都不大感興趣; 朋友見到, 只在每碗承上4粒, 以免浪費; 但她知道女兒愛吃, 在女兒碗上承上7粒.
有一個小朋友走過來, 朋友給他4粒那碗, 他望一望 (因他以前有吃過朋友弄的湯圓), 問可否要7粒那碗

其他小朋友在大人多番慫恿下, 可能玩完一輪又累又餓, 漸漸沒有那麼抗拒, 更在吃完之後自行再去添食, 結果傾刻間全煲湯圓售罄

那一刻是我生平第一次覺得, 美食的魔力

最近賦閒在家, 偶爾都煮一些簡單餸菜.
因為有了internet, 很多人都願意分享美食的做法, 有時照著去做, 就會發現以前做得不好的原因, 可能是欠缺某一些調味料或是方法不對.
當自己覺得好味的時候, 滿足感都很大.
當然我只可以做一些很簡單很簡單的餸菜, 請別期望

突然醒覺, 原來過往失敗的原因是因為時間.
有時間又在心情輕鬆下, 自會享受煮的過程

2012年7月11日星期三

去飲茶

爸爸很喜歡去茶樓飲茶.
小時候的星期日, 他常帶我們姊弟去茶樓飲茶.
或許是小朋友喜歡出街玩, 又或是我們餵食, 我們很少拒絕爸爸帶我們出外飲茶的邀請.

媽媽就曾說過我們奇怪, 因為別家的小朋友總愛留在家看卡通片, 即使他們的爸媽要帶他們出去, 他們還是會拉著鐡閘死命的邊哭邊哀求:『我唔去飲茶呀..... 我要喺屋企睇卡通片呀.....』

有時想, 喜歡去茶樓吃午飯也許是源自小時候的情意結

2012年2月26日星期日

馬拉糕

嗜甜

小時候跟家人去飲茶, 很喜歡吃馬拉糕.
而每次, 當馬拉糕來到的時候, 我總愛吃了面的一層; 而一直, 都沒有人與我爭吃, 所以我總一廂情願的以為, 只有我喜歡吃馬拉糕面的一層.

但最近, 弟弟竟然說, 小時候的我一見馬拉糕就會立即夾去面的一層.
原來, 不是只有我喜歡吃, 只是其他人沒及我快

弟弟, 那以後我讓您吧

2011年9月4日星期日

午餐肉

很喜歡吃午餐肉, 但一定要兩邊都煎得香脆.
年少時候, 有一次媽媽煎了一碟午餐肉做餸, 因為太喜歡, 那一頓飯我一口氣吃了10塊午餐肉

因為很滿足, 飯後還很開心地告訴媽媽, 『我今天吃了10塊午餐肉

』
媽媽大驚, 因為怕資源分配不均 (怕我『獨霸』午餐肉, 兩個弟弟沒得吃), 從此下令每碗飯只可以吃三塊午餐肉

那一刻我真的很後悔, 原本想跟媽媽『分享』我那一個年紀那一刻最開心的事, 卻換來一個『懲罰』

此乃童年陰影, 亦因為怕歷史重現, 慢慢地我不再跟她分享我應為開心或不開心的事

有一次跟同事吃飯的時候重提這一段小時候的趣事, 同事們都已經是媽媽級, 她們的見解是如果當年我媽媽用另一個方法, 不向喜孜孜的小女孩潑冷水, 卻只是在下一次不動聲息地將午餐肉切小一點, 效果可能會好一點!
我同意, 但因為社會環境不同了, 現在我會諒解, 當時要對著三個嘈喧巴閉小孩確是一個很頭痛的事, 怎會還有時間照顧小孩心靈的創傷呢?